ՀՀ ԱՆ. Ակնաբույժները կմասնակցեն կենդանի վիրահատությանը՝ առցանց ռեժիմով

Մեկնարկել է Երիտասարդ ակնաբույժների հայկական ասոցիացիայի և Համահայկական ակնաբույժների ասոցիացիայի կողմից կազմակերպված երկրորդ տարեկան միջազգային գիտաժողովը՝ ՀՀ առողջապահության նախարարության աջակցությամբ: Գիտաժողովին մասնակցելու համար Հայաստան են ժամանել ոլորտի առաջատար մասնագետներ Ռուսաստանի Դաշնությունից, Եվրոպայից և ԱՊՀ երկրներից:

Գիտաժողովի ընթացքում ողջույնի խոսքով հանդես է եկել առողջապահության նախարարի տեղակալ Հովհաննես Հարությունյանը, ով իր խոսքում կարևորել է նմանատիպ գիտական միջոցառումների իրականացումը՝ ապացուցողական բժշկության նորագույն մոտեցումների ներդրման, միջազգային գործընկերների հետ փորձի փոխանակման, ակնաբուժության զարգացման լավագույն նորույթների՝ Հայաստանում ներդրման և բուժաշխատողների շարունակական զարգացման գործընթացի անընդհատության ապահովման տեսանկյունից:

Երկօրյա գիտաժողովի ընթացքում մասնակիցները հնարավորություն կունենան ուկնդրելու դասախոսություններ ակնաբուժության արդիական թեմաների վերաբերյալ, ինչպես նաև մասնակցել միջոցառման կարևոր բաղկացուցիչ մաս կազմող կենդանի վիրահատությանը՝ առցանց ռեժիմով, որի ընթացքում կկարողանան նաև հարցեր ուղղել վիրաբույժներին:

Նշենք, որ գիտաժողովի ծրագիրը հաստատվել է ՀՀ առողջապահության նախարարի հրամանով, մասնակիցներին կշնորհվի ՇՄԶ 9 տեսական և 2 գործնական կրեդիտ, կտրվեն վկայականներ:

Հարցեր, պատասխաններ, մեկնաբանություններ